February 16, 2017

အဖေတူသား

ငယ်ငယ်က ကြားဖူးနေကျ စကားလေး တစ်ခွန်းရှိတယ်။ အဖေတူ သမီး၊ အမေတူ သား ချမ်းသာတယ်တဲ့။ ကျွန်တော် ငယ်ငယ်တုန်းကပေါ့။ ဘယ်သူနဲ့တွေ့တွေ့ တွေ့လိုက်တာနဲ့ နိုင်လင်းက အမေတူ သားလေးပဲ။ ဟုတ်တယ် ကျွန်တော် ကိုယ်၌ကလည်း အမေနဲ့ပဲ တူချင်နေခဲ့တာ။ ကျွန်တော် သိတတ်နားလည်ပြီး အရွယ်ရောက်တဲ့ အချိန်မှာ ကျွန်တော်နားမှာ အမေတစ်ယောက်ထဲ ရှိနေခဲ့တယ်။ ကျွန်တော်ဘဝမှာ အမေတစ်ခု သားတစ်ခု နေလာခဲ့တာ နေသားကျနေပါပြီ။ ကျွန်တော် ဆင်းရဲမှာ အလွန်ကြောက်ခဲ့တယ်။ ကျွန်တော် တစ်နေ့နေ့ ချမ်းသာတဲ့ လူတစ်ယောက် ဖြစ်လိမ့်မယ်လို့ ကျွန်တော်ယုံကြည်နေခဲ့တယ်။ ဘာဖြစ်လို့လဲဆိုတော့ ကျွန်တော် ကြားဖူးနေတဲ့ ဒီစကားလေးတစ်ခွန်း ( အမေတူ သား ချမ်းသာတယ်)ကြောင့် ကျွန်တော်ဟာ တစ်နေ့တော့ ချမ်းသာလာလိမ့်မယ်လို့ ယုံကြည်နေခဲ့တယ်။ ခုချိန်ထိလည်း ကျွန်တော် ယုံကြည်နေတုန်း။ ဓါတ်ပုံတွေ ပြန်ကြည့်လိုက်တိုင်းလည်း ကျွန်တော်ဟာ အဖေနဲ့ တစ်စက်ကလေးမှ မတူဘူးဆိုတာကို လက်ခံနေမိတယ်။

အဖေကတော့ ကျွန်တော်တို့နဲ့ ခွဲသွားခဲ့တာ နှစ်တော်တော်လေး ကြားသွားခဲ့ပါပြီ။ အဖေမရှိလို့ ဘာမှ မဖြစ်ဘူးလို့ ကျွန်တော်စိတ်ကို ကျွန်တော် အမြဲပုံသွင်းခဲ့တယ်။ အဖေနဲ့လည်း ကျွန်တော် မတူချင်ဘူး။ အဖေနဲ့ တူရင် ကျွန်တော် မချမ်းသာတော့မှာကို ကျွန်တော်ကြောက်နေမိတယ်။ အမေနဲ့ပဲ ကျနော် ဇွတ်အတင်း တူဖို့ ကျွန်တော် ကြိုးစားခဲ့တယ်။ အဖေနဲ့ မတူချင်သလို၊ အဖေ့လိုမျိုးလည်း ကျနော် မဖြစ်ချင်ဘူး။ အဖေနဲ့ မတူချင်တဲ့ စိတ်ကပဲ ကျွန်တော်ကို အလုပ်လုပ်ချင်တဲ့ စိတ်တွေ ဖြစ်ပေါ်စေခဲ့တာကို နောက်ပိုင်းမှ ကျွန်တော် အလိုလို သိလာခဲ့ရတယ်။ အဖေဆိုတဲ့ မသိစိတ်တစ်ခုက ကျွန်တော့်ကို လမ်းကြောင်းမှန်ထဲကို ပို့သွင်းပေးခဲ့တယ်။ 

အမြဲတမ်းလိုလို အဖေဟာ ကျွန်တော်ဘဝအတွက် မလိုအပ်ဘူးလို့ ပုံသွင်းထားတဲ့ ကျွန်တော်ရဲ့စိတ်တွေဟာ အဖေ လောကကြီးက ထွက်သွားတဲ့ တစ်နေ့မှာတော့ ကျွန်တော်ဘဝရဲ့ ဆုံးရှုံးမှုတွေတိုင်းမှာ တစ်ခါမှ မကျခဲ့ဖူးတဲ့ မျက်ရည်တွေဟာ တားဆီးလို့ မရအောင်ဖြစ်ခဲ့ရတယ်။ ကျွန်တော် လူရှေ့သူရှေ့မှာ မငိုခဲ့ဘူး။ ကျွန်တော် ငိုနေတာကို ဘယ်သူ့ကိုမှ မမြင်စေချင်ခဲ့ဘူး။ နောက်ဆုံး ကျွန်တော့်ကို အသည်းမာတဲ့ကောင်လို့ ပြောကြတဲ့ အထိခံခဲ့ရတယ်။ ဒါပင်မဲ့ ဘယ်သူမှ မသိတဲ့ အချိန် ကျွန်တော် တစ်ယောက်တည်း ငိုနေခဲ့ရတယ်။ ကျွန်တော့ ပါးပြင်ပေါ် စီးကျလာတဲ့ မျက်ရည်တွေနဲ့အတူ အဖေက သူမရှိတော့တဲ့ နောက်ပိုင်း ကျွန်တော့်ကို ဘာဆက်လုပ်ရမယ်ဆိုတာ ပြောပြနေခဲ့တာ ဘယ်သူများသိနိုင်မှာလဲ။

ကျွန်တော် မျက်ရည်တွေသာ ကျနေခဲ့တာ။ ခုချိန်ထိ အဖေနဲ့ တူချင်တဲ့ စိတ်ကလေး တစ်စက်ကလေးမှ မဖြစ်ခဲ့သေးဘူး။ ကျွန်တော် တစ်နေ့ ချမ်းသာလာလိမ့်မယ် ဆိုတဲ့ ခံယူချက်နဲ့ အလုပ်တွေကို လုပ်လာခဲ့တာ ၁၀နှစ်တောင် ကျော်တော့မယ်။ အသက်အရွယ်အရဆိုရင်လည်း လူလတ်ပိုင်းထဲရောက်နေပြီ။ ဖခင်တစ်ယောက်ရဲ့ ခံစားချက်မျိုးရှိနေပင်မဲ့ ကျွန်တော် အဖေနဲ့ လုံးဝ မတူချင်သေးဘူး။ ဒါပင်မဲ့ တစ်နေ့မှာတော့ ဖခင်တစ်ယောက်ရဲ့ ရင်ကို အစိမ်းသက်သက်ခွဲ စေမဲ့ ကျွန်တော့်သားငယ်ရဲ့ စကားကို ကြားလိုက်ရတဲ့ အချိန်မှာတော့ ကျွန်တော်ဟာ အဖေ့ကို သိပ်ချစ်ခဲ့တဲ့ ကောင်ပါလားဆိုတာ သိလိုက်ရတယ်။

ကျွန်တော် ဧည့်ခန်းထဲမှာ သတင်းစာဖတ်နေတုန်း အပြင်က ပြန်လာတဲ့ ကျွန်တော့် အမျိုးသမီးနဲ့ သားငယ် အိမ်ထဲအရောက်မှာတော့ ..... မေမေ့ စကားဆို နည်းနည်းမှ နားမထောင်ဘူး..... သား လုပ်ချင်ရာ သားလုပ်တယ်.... မင်း အဖေနဲ့ တစ်ပုံစံတည်းပဲ.... ကျွန်တော့်အမျိုးသမီးဆီက ဒီစကားထွက်လာအပြီးမှာတော့.....

သား ..... ဖေဖေ နဲ့ မတူချင်ပါဘူးဗျာ...... ကျွန်တော် ကြားလိုက်ရတဲ့ အချိန်မှာတော့ လက်ထဲမှာ ကိုင်ထားတဲ့ သတင်းစာ ကြမ်းပြင်ပေါ် ပြုတ်ကျသွားတဲ့ အထိအောင် ကျွန်တော်ဟာ ငေးငိုင်သွားခဲ့ရပါတယ်။

ဝဋ္ဋ်ဆိုတာ နောက်ဘဝ မကူးဘူးဆိုတာကို ကျွန်တော် နားလည်သဘောပေါက်သွားခဲ့တယ်။ ကျွန်တော့်တုန်းက အဖေ့ရှေ့မှာ အဖေနဲ့ မတူချင်ပါဘူးဆိုတဲ့ စကားမျိုးကို မပြောဖြစ်ခဲ့ပင်မဲ့ အမြဲတမ်းလိုလိုတော့ အဖေနဲ့ မတူချင်ခဲ့တာ အမှန်ပါ။ 

ခုတော့ အဖေနဲ့ မတူချင်တဲ့ အဖေ့သားမှာ သားလိုပဲ အဖေနဲ့ မတူချင်တဲ့ သား တစ်ယောက် ရှိနေပြီ ဆိုတာ ပြောပြလို့ရရင် ပြောပြချင်မိပါတော့တယ် အဖေရယ်။


လေးစားစွာဖြင့်
ရီနိုမာန်   

No comments: